दोन वाहतूक पोलिसांविरुद्ध दाखल केलेली खोटी तक्रार फेटाळली

अमरावती येथील विभागीय पोलीस तक्रार प्राधिकरणाने दोन वाहतूक पोलीस कर्मचाऱ्यांविरुद्ध दाखल करण्यात आलेली तक्रार फेटाळून लावली आहे. तसेच कथितरित्या खोटी तक्रार दाखल केल्याप्रकरणी तक्रारदाराविरुद्ध कायदेशीर कारवाई सुरू करण्याचे निर्देशही प्राधिकरणाने दिले आहेत.

ही तक्रार अमरावती येथील कठोरा रोडवरील ‘कुंड खुर्द पुनर्वसन’ भागातील रहिवासी प्रदीप देवीदास इंगोले यांनी जिल्हा वाहतूक शाखा (अमरावती ग्रामीण) येथील पोलीस हवालदार अतुल मनोहर भुयार व पोलीस शिपाई अरविंद महादेवराव सरोदे यांच्याविरुद्ध दाखल केली होती.

सीट बेल्ट न लावता वाहन चालवत असताना संबंधित पोलिसांनी आपल्याकडे ५०० रुपयांची मागणी केली होती, असा आरोप इंगोले यांनी केला होता.

मात्र या प्रकरणाची सखोल चौकशी केल्यानंतर प्राधिकरणाला आरोपांच्या पुष्टीसाठी कोणताही ठोस पुरावा आढळला नाही. त्यामुळे ही तक्रार खोटी असल्याचा निष्कर्ष प्राधिकरणाने काढला.

अध्यक्षा उषा एस. ठाकरे तसेच सदस्य पी. टी. पाटील आणि पंकज निखार यांच्या खंडपीठाने हा निर्णय दिला. ‘महाराष्ट्र पोलीस (सुधारणा आणि सातत्य) अधिनियम, २०१४’ च्या कलम २२Q(1)(a)(v) व (viii) अन्वये पोलीस कर्मचाऱ्यांकडून कोणतीही गैरवर्तणूक झाल्याचे सिद्ध करण्यात तक्रारदार अपयशी ठरल्याचे नमूद करण्यात आले.

तसेच प्राधिकरणाने आपल्या प्रशासकीय अधिकाऱ्याला तक्रारदार प्रदीप इंगोले यांच्याविरुद्ध आवश्यक ती कायदेशीर कारवाई करण्याचे अधिकार दिले आहेत.