भारतीय संस्कृतीचा वारसा जपत ‘सत्य वृक्ष पूजन’ उपक्रमातून पर्यावरण संवर्धनाचा प्रभावी संदेश; विद्यार्थ्यांमध्ये जागृतीचा नवा अध्याय
भारतीय संस्कृतीचा वारसा जपत ‘सत्य वृक्ष पूजन’ उपक्रमातून पर्यावरण संवर्धनाचा प्रभावी संदेश; विद्यार्थ्यांमध्ये जागृतीचा नवा अध्याय
बीड प्रतिनिधी : दिनांक 09 जुलै 2026 रोजी अखिल भारतीय विद्यार्थी परिषद (अभाविप) स्थापनेदिन व राष्ट्रीय विद्यार्थी दिनानिमित्त अभाविपच्या पर्यावरण गतिविधी अंतर्गत विकासार्थ विद्यार्थी (SFD) यांच्या संयुक्त विद्यमाने सौ. के. एस. के. (काकू) कृषी महाविद्यालय, बीड येथे ‘सत्य वृक्ष पूजन’ या अभिनव, प्रेरणादायी व मूल्याधिष्ठित उपक्रमाचे मोठ्या उत्साहात आयोजन करण्यात आले. भारतीय संस्कृतीतील निसर्ग पूजन व संवर्धन या महान परंपरेचा जागर करीत या कार्यक्रमातून पर्यावरण रक्षणाचा प्रभावी संदेश समाजात पोहोचविण्यात आला.
कार्यक्रमाची सुरुवात अत्यंत शास्त्रशुद्ध व पारंपरिक पद्धतीने ‘सत्य वृक्ष पूजन’ करून करण्यात आली. वृक्षाला जीवनाचे, समृद्धीचे व पर्यावरणीय संतुलनाचे प्रतीक मानत विद्यार्थ्यांनी श्रद्धा, आदर आणि कृतज्ञतेच्या भावनेने वृक्षपूजन केले. या प्रसंगी पूजनानंतर महाविद्यालयाच्या परिसरात सर्व विद्यार्थ्यांनी मिळून वड, पिंपळ, कडुलिंब, जांभूळ, उंबर आणि बेल अशा विविध प्रकारच्या एकूण 100 औषधी व पर्यावरणपूरक झाडांची मोठ्या उत्साहात लागवड केली. वृक्षारोपणाचा हा टप्पा पार पाडत ‘एक विद्यार्थी – एक वृक्ष’ हा संकल्प प्रत्यक्षात साकारण्यात आला. या उपक्रमातून विद्यार्थ्यांमध्ये निसर्गाशी जुळलेले सांस्कृतिक नाते अधिक दृढ करण्याचा प्रयत्न करण्यात आला.
यावेळी विद्यार्थ्यांना पर्यावरण संवर्धनाची शपथ देण्यात आली. “वृक्ष लावा, वृक्ष जगवा” या संदेशासह प्रत्येकाने किमान एक वृक्ष लावून त्याचे संगोपन करण्याचा निर्धार व्यक्त केला. कार्यक्रमादरम्यान पर्यावरण संवर्धन, जैवविविधतेचे महत्त्व, जलसंधारण, मृदसंधारण तसेच शाश्वत कृषी पद्धती याबाबत सविस्तर मार्गदर्शन करण्यात आले.
कार्यक्रमात विशेषतः पर्यावरण संवर्धन क्षेत्रात उत्कृष्ट कार्य करणाऱ्या पद्मश्री पुरस्कार विजेत्या व्यक्तींच्या कार्याची माहिती विद्यार्थ्यांना देण्यात आली. तसेच अत्यंत कठीण परिस्थितीत, प्रतिकूल परिस्थितीवर मात करत निसर्ग रक्षणासाठी आयुष्य वाहून घेतलेल्या पर्यावरणप्रेमींच्या प्रेरणादायी कार्याचा सविस्तर आढावा सादर करण्यात आला. या प्रेरणादायी उदाहरणांमुळे विद्यार्थ्यांमध्ये समाजहितासाठी कार्य करण्याची भावना अधिक दृढ झाली.
या उपक्रमामागील प्रमुख उद्देश निसर्गाचे संरक्षण, पर्यावरणाबाबत जनजागृती निर्माण करणे, समाजातील विविध घटकांना एकत्र आणणे तसेच पर्यावरणपूरक व सकारात्मक जीवनशैलीचा प्रसार करणे हा होता. विद्यार्थ्यांनी मोठ्या उत्साहाने सहभाग घेतला व पर्यावरण संवर्धनासाठी आपली बांधिलकी व्यक्त केली.
कार्यक्रमाच्या अध्यक्षस्थानी महाविद्यालयाचे प्राचार्य साळुंके सर उपस्थित होते. या कार्यक्रमाचे प्रमुख सत्यवृक्ष पूजनाचे मा. महेश खरे सर (सोमदरा गुरुकुल डोमरी आश्रम), अभाविप बीड विभाग संघटक मंत्री अजय टोले, विभाग संयोजक आशिष वारे, जिज्ञासा शहर संयोजक विजय भुबरे आणि गणेश खांडगे यांची उपस्थिती लाभली. याशिवाय अभाविपचे पदाधिकारी, कार्यकर्ते व महाविद्यालयातील विद्यार्थी मोठ्या संख्येने उपस्थित होते.
उपस्थित मान्यवरांनी आपल्या मार्गदर्शनपर मनोगतातून वृक्षसंवर्धनाचे महत्त्व अधोरेखित करत सांगितले की, “आजच्या काळात पर्यावरण संवर्धन ही केवळ गरज नसून ती प्रत्येकाची जबाबदारी आहे.” त्यांनी विद्यार्थ्यांना निसर्गाशी सुसंवाद साधत पर्यावरणपूरक जीवनशैली अंगीकारण्याचे आवाहन केले.
भारतीय संस्कृतीतील निसर्गपूजनाची परंपरा जपत आणि आधुनिक पर्यावरणीय गरजांची सांगड घालत राबविण्यात आलेल्या या ‘सत्य वृक्ष पूजन’ उपक्रमामुळे विद्यार्थ्यांमध्ये पर्यावरणाबद्दल जागरूकता निर्माण झाली असून निसर्गाशी असलेले नाते अधिक बळकट झाले आहे. संपूर्ण कार्यक्रम प्रेरणादायी, शिस्तबद्ध व उत्साहपूर्ण वातावरणात यशस्वीरित्या संपन्न झाला.
