शैक्षणिक क्षेत्रात तब्बल ३७ वर्षे निष्ठा, प्रामाणिकपणा आणि कर्तव्यभावनेने सेवा बजावणारे आदर्श शिक्षक नामदेव शिंदे हे दिनांक ३१ मे रोजी सेवानिवृत्त होत आहेत. त्यांच्या सेवानिवृत्तीमुळे शिक्षकवर्ग, ग्रामस्थ, सहकारी तसेच माजी विद्यार्थ्यांमध्ये भावनिक वातावरण निर्माण झाले आहे.

नामदेव शिंदे यांनी अत्यंत साध्या परिस्थितीतून शिक्षक म्हणून आपल्या सेवेला सुरुवात केली. विद्यार्थ्यांना गुणवत्तापूर्ण शिक्षणासोबतच संस्कारमूल्ये देण्याचे कार्य त्यांनी सातत्याने केले. प्राथमिक शिक्षक ते मुख्याध्यापक असा त्यांचा प्रेरणादायी प्रवास अनेकांसाठी आदर्श ठरला आहे.

मुख्याध्यापक म्हणून कार्यरत असताना त्यांनी शाळेच्या शैक्षणिक गुणवत्तेत उल्लेखनीय वाढ घडवून आणली. शाळेच्या पायाभूत सुविधांचा विकास, शिक्षकांचे मार्गदर्शन, पालकांशी समन्वय तसेच विद्यार्थ्यांच्या सर्वांगीण प्रगतीसाठी विविध उपक्रम प्रभावीपणे राबविले. त्यामुळे त्यांची ओळख आदर्श व कार्यक्षम मुख्याध्यापक म्हणून निर्माण झाली.

केंद्रप्रमुख म्हणून त्यांनी अनेक शाळांचे समन्वयक म्हणून जबाबदारी यशस्वीपणे पार पाडली. प्रशिक्षण, निरीक्षण आणि विविध शैक्षणिक उपक्रमांमधून त्यांनी शिक्षकांना प्रेरित केले. शिक्षक संघटनांमध्येही त्यांनी सक्रिय भूमिका बजावत शिक्षकांच्या प्रश्नांसाठी सातत्याने आवाज उठवला.

शिक्षक सहकारी सोसायटीमध्ये संचालक ते चेअरमन पदापर्यंत कार्य करताना अनेक शिक्षकांच्या आर्थिक अडचणी सोडवण्यासाठी त्यांनी मोलाचे योगदान दिले. शिंदे सरांचा साधेपणा, विद्यार्थ्यांप्रती असलेले प्रेम, शिस्तप्रियता आणि प्रेरणादायी मार्गदर्शन यामुळे त्यांनी विद्यार्थ्यांच्या मनावर अधिराज्य गाजवले.

त्यांच्या गौरवशाली सेवेला मानाचा मुजरा देण्यासाठी शिक्षक, शिक्षकेतर कर्मचारी, ग्रामस्थ आणि माजी विद्यार्थ्यांच्या उपस्थितीत निरोप समारंभाचे आयोजन करण्यात आले आहे. त्यांच्या पुढील आयुष्यास उत्तम स्वास्थ्य, दीर्घायुष्य आणि आनंदी जीवन लाभावे, अशा शुभेच्छा सर्व स्तरांतून व्यक्त होत आहेत.

चौकट

“नामदेव शिंदे सर हे शिक्षण क्षेत्रातील कर्तव्यनिष्ठ, शिस्तप्रिय आणि विद्यार्थ्यांवर प्रेम करणारे आदर्श व्यक्तिमत्त्व आहे. शिक्षक, मुख्याध्यापक आणि केंद्रप्रमुख म्हणून त्यांनी केलेले कार्य प्रेरणादायी आहे. त्यांच्या मार्गदर्शनातून अनेक विद्यार्थी आणि शिक्षक घडले. शिंदे सरांची सेवाभावी परंपरा कायम स्मरणात राहील. त्यांच्या पुढील आयुष्यास उत्तम स्वास्थ्य, दीर्घायुष्य आणि आनंद लाभावा, हीच सदिच्छा.”