पालिकेच्या मालकीचे ओपनस्पेस गिळंकृत करणाऱ्यांचा होणार पर्दाफाश : मुळूक
शहरातील भू माफियांनी नगर पालिका कर्मचाऱ्यांना हाताशी धरुन शहरातील महत्वाच्या ठिकाणी असलेल्या ओपन स्पेसवर मोठ्या प्रमाणात अतिक्रमण केले आहे. एवढेच नाही तर कर्मचाऱ्यांना हाताशी करुन ओपन स्पेसचे बोगस पीटीआर आणि पीआर कार्डही काढले आहेत. या प्रकरणी शिवसेना जिल्हाप्रमुख सचिन मुळूक यांनी शिवसेनेचे मुख्यनेते तथा राज्याचे संवेदनशील उपमुख्यमंत्री एकनाथ शिंदे यांची भेट घेऊन निवेदन दिले. या प्रकरणी उपमुख्यमंत्री एकनाथ शिंदे यांनी प्रधान सचिव यांना बीड नगर पालिकेतील बोगस पीटीआर, पीआर व अनाधिकृत अतिक्रमण करुन गिळंकृत केलेल्या ओपन स्पेस संदर्भात चौकशी करण्याचे आदेश दिले आहेत. उपमुख्यमंत्र्यांच्या आदेशानंतर मुख्याधिकाऱ्यांनी चौकशी समिती नेमली आहे. पालिकेचे नगररचनाकार द.शं.तरोडे हे समितीचे अध्यक्ष असून समितीमध्ये आठ जणांचा समावेश आहे. मुख्याधिकाऱ्यांनी समिती गठित केल्याचे आदेशही काढले असून नगर पालिकेच्या जागांची बीड नगर पालिकेच्या नावे पीटीआर वर नोंद असल्याची अभिन्यासनिहाय तसेच प्रत्यक्ष स्थळ पाहणी करुन खात्री करावी, शहरातील नगर पालिका हद्दीमधील सर्व अभिन्यासातील खुल्या जागांची तसेच नगरपालिकेच्या मालकीच्या जागांची पीटीआर तयार करुन त्यांचे एकत्रित नगर पालिका मालमत्ता रजिस्टर तयार करावे असे आदेशात म्हटले आहे. या प्रकरणी अनुपालन अहवाल 15 दिवसांत सादर करावा, यात विलंब झाल्यास समिती अध्यक्ष जबाबदार राहतील असेही मुख्याधिकाऱ्यांनी आदेशात म्हटले आहे. दरम्यान चौकशी समितीचा अहवाल आल्यानंतर भू माफियांसह नगर पालिकेतील अधिकारी, व कर्मचारी यांचेही पितळ उघडले पडणार असून मुख्याधिकाऱ्यांनी नेमलेली समिती नि:पक्ष काम करेल असा विश्वास जिल्हाप्रमुख सचिन मुळूक यांनी व्यक्त केला आहे.
