ठेकेदारी अन् भ्रष्टाचाराच्या चिखलात २४ कोटींच्या  नळपाणी योजनेचा पुरता बोजवरा!!

श्रीवर्धन (संदेश घोलप) एकीकडे कोट्यवधी रुपयांच्या पाणी योजनांचे कागदी घोडे नाचवले जात असताना, दुसरीकडे मात्र ऐतिहासिक श्रीवर्धनची जनता पाण्यासाठी थेंब-थेंब तडफडत आहे. जनतेने मोठ्या विश्वासाने ज्या लोकप्रतिनिधींना मतदान करून निवडून दिले, त्यांनीच आता जनतेला वाऱ्यावर सोडल्याची तीव्र भावना निर्माण झाली आहे. २४ कोटी रुपयांच्या नळपाणी योजनेत झालेल्या कथित भ्रष्टाचारामुळे श्रीवर्धनकरांवर ही भीषण वेळ आली असून, “संबंधित कंत्राटदाराला अद्याप ब्लॅकलिस्ट का टाकले नाही? त्याच्यावर अद्याप गुन्हा का नोंदवला नाही? तो सरकारचा जावई आहे का?” असा थेट आणि आक्रमक सवाल श्रीवर्धन नगरपालिकेचे विरोधी पक्षनेते पिंट्याशेठ वेश्विकर यांनी सत्ताधाऱ्यांना विचारला असून या मुद्द्यावरून आता संपूर्ण तालुक्यात राजकीय खळबळ उडाली आहे.