सार्वजनिक वाचनालय श्रीवर्धनतर्फे लोकप्रतिनिधींचा सत्कार व सोरटी सोमनाथ मंदिराच्या इतिहासावर अभ्यासपूर्ण व्याख्यान

श्रीवर्धन (संदेश घोलप) :रविवार, दिनांक १ फेब्रुवारी २०२६ रोजी सार्वजनिक वाचनालय श्रीवर्धन यांच्या वतीने सामाजिक, सांस्कृतिक व वैचारिक दृष्ट्या महत्त्वपूर्ण अशा कार्यक्रमाचे आयोजन करण्यात आले या कार्यक्रमाकरिता नवनिर्वाचित नगराध्यक्ष मा. अतुलजी चौगुले उपस्थित होते. तसेच उपनगराध्यक्ष मा. अनंतजी गुरव, नगरपरिषदेतील सर्व नगरसेवक व नगरसेविका, सार्वजनिक वाचनालयाचे पदाधिकारी, सदस्य, स्थानिक नागरिक, विद्यार्थी व इतिहासप्रेमी मोठ्या संख्येने उपस्थित होते.

कार्यक्रमाच्या सुरुवातीला सार्वजनिक वाचनालय श्रीवर्धन यांच्या वतीने नगराध्यक्ष, उपनगराध्यक्ष तसेच सर्व नवनिर्वाचित नगरसेवक व नगरसेविका यांचा सत्कार करून शुभेच्छा देण्यात आल्या. लोकप्रतिनिधींनी वाचनालयाच्या कार्याचे कौतुक करत भविष्यातही असेच सामाजिक, शैक्षणिक व सांस्कृतिक उपक्रम राबवावेत, अशी अपेक्षा व्यक्त केली. ज्येष्ठ नेते व सुप्रसिद्ध विचारवंत मा. श्री. माधव भांडारी यांचे “सोरटी सोमनाथ मंदिराचा इतिहास” या विषयावर सखोल व अभ्यासपूर्ण व्याख्यान आयोजित करण्यात आले.

कार्यक्रमाची सुरुवात दीपप्रज्वलन व स्वागतपर भाषणाने झाली. यानंतर नगराध्यक्ष, उपनगराध्यक्ष तसेच सर्व नगरसेवक व नगरसेविका यांचा शाल, श्रीफळ व सन्मानचिन्ह देऊन गौरव करण्यात आला. शहराच्या विकासात लोकप्रतिनिधींचे योगदान महत्त्वाचे असून समाजहितासाठी त्यांचे कार्य प्रेरणादायी असल्याचे यावेळी आयोजकांनी सांगितले.

यानंतर प्रमुख वक्ते मा. श्री. माधव भांडारी यांनी सोरटी सोमनाथ मंदिराच्या इतिहासावर मार्गदर्शन करताना प्राचीन भारताचा समृद्ध सांस्कृतिक व धार्मिक वारसा उलगडून सांगितला. त्यांनी सोमनाथ मंदिराच्या स्थापनेपासून ते विविध ऐतिहासिक कालखंडातील घडामोडी, परकीय आक्रमणे, मंदिराची झालेली विध्वंसक हानी व त्यानंतर झालेल्या पुनर्बांधणीचा सविस्तर आढावा घेतला. सोमनाथ मंदिर हे श्रद्धेचे प्रतीक असून भारतीय संस्कृतीच्या अविचलतेचे दर्शन घडवते, असे त्यांनी नमूद केले.

भांडारी यांच्या प्रभावी वक्तृत्वशैलीमुळे उपस्थित श्रोते मंत्रमुग्ध झाले. इतिहास, धर्म व राष्ट्रसंस्कृती यांचे संदर्भ देत त्यांनी विषय अत्यंत रोचक पद्धतीने मांडला. उपस्थितांनी वेळोवेळी टाळ्यांच्या गजरात त्यांना दाद दिली.

या कार्यक्रमाला शहरातील नागरिक, ज्येष्ठ मंडळी, विद्यार्थी, अभ्यासक, इतिहासप्रेमी, वाचनालयाचे आजीव सभासद तसेच विविध सामाजिक संघटनांचे प्रतिनिधी मोठ्या संख्येने उपस्थित होते. सार्वजनिक वाचनालय श्रीवर्धनसारख्या संस्थांमुळे समाजात वाचनसंस्कृती, वैचारिक जागृती व इतिहासाबद्दलची जाणीव वाढीस लागते, असे मत उपस्थित मान्यवरांनी व्यक्त केले.

कार्यक्रमाच्या यशस्वी आयोजनासाठी सार्वजनिक वाचनालय श्रीवर्धनचे अध्यक्ष, सचिव, कार्यकारिणी सदस्य तसेच स्वयंसेवकांनी विशेष परिश्रम घेतले. कार्यक्रमाच्या शेवटी आयोजकांच्या वतीने प्रमुख पाहुणे, वक्ते व सर्व उपस्थितांचे आभार मानण्यात आले.

हा कार्यक्रम केवळ सत्कारापुरता मर्यादित न राहता समाजात सांस्कृतिक, ऐतिहासिक व वैचारिक जाणीव निर्माण करणारा ठरला.