बीड
हरिहरेश्वर समुद्रकिनाऱ्यावर अनोळखी पुरुषाचा मृतदेह आढळला; महाड परिसरातून वाहून आल्याचा संशय श्रीवर्धन पोलिसांचे ओळख पटवण्याचे आवाहन; मृतदेह शासकीय रुग्णालयाच्या शवगृहात
हरिहरेश्वर समुद्रकिनाऱ्यावर अनोळखी पुरुषाचा मृतदेह आढळला; महाड परिसरातून वाहून आल्याचा संशय
श्रीवर्धन पोलिसांचे ओळख पटवण्याचे आवाहन; मृतदेह शासकीय रुग्णालयाच्या शवगृहात
श्रीवर्धन (संदेश घोलप):
श्रीवर्धन तालुक्यातील प्रसिद्ध धार्मिक व पर्यटन स्थळ असलेल्या हरिहरेश्वर येथील एमटीडीसी (MTDC) बीच परिसरात एका अनोळखी पुरुषाचा मृतदेह आढळून आल्याने परिसरात मोठी खळबळ उडाली आहे. गेल्या आठवड्यात संपूर्ण रायगड जिल्ह्यात झालेल्या मुसळधार पावसात आणि वादळात सदर मृतदेह महाड परिसराकडून नदीपात्राद्वारे समुद्रात आणि तिथून पुढे हरिहरेश्वर किनारपट्टीवर वाहून आला असावा, असा प्राथमिक संशय पोलिसांनी व्यक्त केला आहे.
याबाबत मिळालेली सविस्तर माहिती अशी की, हरिहरेश्वर येथील एमटीडीसी रिसॉर्ट जवळील समुद्रकिनाऱ्यावर स्थानिक नागरिकांना एक मृतदेह किनाऱ्यालगत अडकलेल्या अवस्थेत दिसून आला. नागरिकांनी तत्परता दाखवत या घटनेची माहिती श्रीवर्धन पोलीस ठाण्याला दिली. माहिती मिळताच श्रीवर्धन पोलीस ठाण्याचे अधिकारी आणि अंमलदार यांनी तातडीने घटनास्थळी धाव घेतली. पोलिसांनी स्थानिक ग्रामस्थांच्या व जीवरक्षकांच्या मदतीने मृतदेह समुद्राबाहेर काढून त्याचा पंचनामा केला.
’महाड कनेक्शन’चा पोलिसांना संशय
गेल्या आठवड्यात महाड आणि परिसरात ढगफुटीसदृश मुसळधार पाऊस झाला होता, तसेच जोरदार वादळही आले होते. या पूरपरिस्थितीत महाड किंवा आसपासच्या परिसरात एखादी व्यक्ती नदीच्या पुरात वाहून गेली असण्याची शक्यता वर्तवली जात आहे. महाड येथील सावित्री नदीचे पाणी थेट बाणकोटच्या खाडीतून समुद्राला मिळत असल्याने, हा मृतदेह महाडकडून समुद्राच्या प्रवाहासोबत वाहत हरिहरेश्वर किनाऱ्याला लागला असावा, असा पोलिसांचा प्राथमिक अंदाज आहे.
पोलीस प्रशासनाचे जाहीर आवाहन
मृतदेहाची ओळख अद्याप पटलेली नाही. सद्यस्थितीत हा मृतदेह ओळख पटवण्यासाठी श्रीवर्धन येथील शासकीय रुग्णालयाच्या शवगृहात सुरक्षित ठेवण्यात आला आहे. या मृत व्यक्तीबाबत कोणाकडेही काही माहिती असल्यास, किंवा गेल्या काही दिवसांत महाड, श्रीवर्धन अथवा आसपासच्या परिसरातून एखादी व्यक्ती बेपत्ता झाली असल्यास, त्यांनी तातडीने खालील क्रमांकावर श्रीवर्धन पोलिसांशी संपर्क साधावा, असे आवाहन पोलीस प्रशासनाच्या वतीने करण्यात आले आहे.
संपर्क:
श्रीवर्धन पोलीस ठाणे
📱 दूरध्वनी क्रमांक: ०२१४७-२२२२२८
