बीड
मराठवाड्यातील दुष्काळग्रस्तांचे मायक्रो फायनान्स व बचत गटांचे कर्ज माफ करा; सक्तीच्या वसुलीला स्थगिती द्या!

मराठवाड्यातील दुष्काळग्रस्तांचे मायक्रो फायनान्स व बचत गटांचे कर्ज माफ करा; सक्तीच्या वसुलीला स्थगिती द्या!
मुख्यमंत्री देवेंद्र फडणवीस यांच्याकडे शेख वसीम शेख सलीम यांची मागणी; अन्यथा आझाद मैदानावर बेमुदत आमरण उपोषणाचा इशारा
बीड / प्रतिनिधी
मराठवाड्यातील भीषण दुष्काळी परिस्थितीमुळे शेतकरी, शेतमजूर, कष्टकरी, महिला, सुशिक्षित बेरोजगार तरुण, छोटे व्यावसायिक आणि आर्थिकदृष्ट्या दुर्बल कुटुंबांचे जनजीवन विस्कळीत झाले आहे. अशा संकटाच्या काळात मायक्रो फायनान्स कंपन्या आणि बचत गटांच्या कर्जाच्या हप्त्यांसाठी होणाऱ्या कथित सक्तीच्या वसुलीमुळे सर्वसामान्य नागरिकांना आर्थिक व मानसिक त्रास सहन करावा लागत असल्याचा मुद्दा उपस्थित करत शेख वसीम शेख सलीम यांनी मुख्यमंत्री कार्यालय, मंत्रालय, मुंबई येथे निवेदन सादर केले आहे.
मराठवाड्यातील शहरी आणि ग्रामीण भागातील आर्थिकदृष्ट्या दुर्बल कर्जदारांचे मायक्रो फायनान्स व बचत गटांचे कर्ज माफ करावे, तसेच दुष्काळी परिस्थिती सामान्य होईपर्यंत कर्जवसुलीस तातडीने स्थगिती देण्यासाठी शासनाने आवश्यक निर्णय घ्यावा, अशी प्रमुख मागणी या निवेदनातून करण्यात आली आहे.
पावसाच्या अभावामुळे शेतीपिकांचे नुकसान होत असून शेतकरी आणि शेतमजुरांच्या हाताला पुरेसे काम मिळणे कठीण झाले आहे. ग्रामीण अर्थव्यवस्थेवर झालेल्या परिणामांचा फटका शहरी भागातील रोजंदारीवर काम करणारे मजूर, छोटे व्यावसायिक आणि बेरोजगार तरुणांनाही बसत आहे. वाढती महागाई, रोजगाराची कमतरता आणि उत्पन्नातील घट यामुळे अनेक कुटुंबांना दैनंदिन गरजा भागविणेही कठीण होत असल्याचे निवेदनात नमूद करण्यात आले आहे.
अनेक महिला, कष्टकरी कुटुंबे आणि बेरोजगार तरुणांनी घरखर्च, दैनंदिन गरजा तसेच छोट्या व्यवसायांसाठी मायक्रो फायनान्स कंपन्या आणि बचत गटांच्या माध्यमातून कर्ज घेतले आहे. मात्र, आर्थिक परिस्थिती बिकट झाल्याने कर्जाचे हप्ते भरणे कठीण होत असून या कर्जदारांना दिलासा देण्याची गरज असल्याचे शेख वसीम शेख सलीम यांनी म्हटले आहे.
काही मायक्रो फायनान्स कंपन्यांच्या प्रतिनिधींकडून कर्जवसुलीसाठी वारंवार तगादा लावणे, कर्जदारांच्या घरी जाऊन दबाव निर्माण करणे आणि अपमानास्पद वागणूक दिली जात असल्याच्या तक्रारी असल्याचे निवेदनात नमूद करण्यात आले आहे. दुष्काळामुळे आर्थिक संकटात सापडलेल्या कुटुंबांना अशा प्रकारांमुळे मानसिक त्रासाला सामोरे जावे लागत असल्याने संबंधित तक्रारींची चौकशी करून दोषींवर नियमानुसार कारवाई करावी, अशी मागणीही करण्यात आली आहे.
या मागण्यांवर शासनाने सकारात्मक निर्णय घेऊन ठोस कार्यवाही न केल्यास मुंबई येथील आझाद मैदानावर लोकशाही व शांततामय मार्गाने बेमुदत आमरण उपोषणास बसण्याचा इशारा शेख वसीम शेख सलीम यांनी दिला आहे.



