जामखेड नगरपरिषदेच्या निवडणुकीसाठी आरक्षण जाहीर

जामखेड : गेल्या पाच वर्षांपासून रखडलेल्या स्थानिक स्वराज्य संस्थांच्या निवडणुक प्रक्रियेला अखेर गती मिळाली आहे. जामखेड नगरपरिषदेच्या निवडणुकीसाठी अंतिम प्रभाग रचना जाहीर झाल्यानंतर बुधवारी (दि. ८ ऑक्टोबर) प्रभागनिहाय आरक्षणाची सोडत काढण्यात आली. ही सोडत कर्जतचे प्रांताधिकारी तथा पिठासन अधिकारी नितीन पाटील यांच्या अध्यक्षतेखाली जामखेड पंचायत समिती कार्यालयात पार पडली. यावेळी मुख्याधिकारी अजय साळवे, तसेच विविध पक्षांचे पदाधिकारी, इच्छुक उमेदवार आणि नागरिक मोठ्या संख्येने उपस्थित होते.

सोडतीचा कार्यक्रम अत्यंत पारदर्शक पद्धतीने पार पडला. प्राथमिक शाळेतील विद्यार्थी श्रेयश सागर व्यवहारे, साई प्रमोद टेकाळे आणि मोक्षदा मयुर पुजारी यांच्या हस्ते प्रभागानुसार व क्रमांकानुसार सोडत काढण्यात आली.

प्रभागनिहाय आरक्षणाची माहिती पुढीलप्रमाणे आहे :

प्रभाग क्र. जागा (अ) जागा (ब)

१ नागरिकांचा मागास प्रवर्ग महिला सर्वसाधारण
२ नागरिकांचा मागास प्रवर्ग सर्वसाधारण महिला
३ नागरिकांचा मागास प्रवर्ग सर्वसाधारण महिला
४ अनुसूचित जाती सर्वसाधारण महिला
५ अनु. जमाती सर्वसाधारण महिला
६ अनुसूचित जाती महिला सर्वसाधारण
७ सर्वसाधारण महिला सर्वसाधारण
८ नागरिकांचा मागास प्रवर्ग महिला सर्वसाधारण
९ सर्वसाधारण महिला सर्वसाधारण
१० नागरिकांचा मागास प्रवर्ग महिला सर्वसाधारण
११ नागरिकांचा मागास प्रवर्ग सर्वसाधारण महिला
१२ अनुसूचित जाती महिला सर्वसाधारण

या आरक्षण सोडतीनंतर ९ ऑक्टोबर ते १४ ऑक्टोबर २०२५ या कालावधीत हरकती दाखल करण्याची मुदत निश्चित करण्यात आली आहे. इच्छुकांनी विहित नमुन्यात नगरपरिषद कार्यालयात आपली हरकत सादर करता येईल.

या सोडतीनुसार प्रत्येक प्रभागातील (अ) आणि (ब) अशा दोन जागांसाठी समान क्रमांकानुसार उमेदवार निवडणुकीच्या रिंगणात असतील. आरक्षण जाहीर झाल्यानंतर शहरातील राजकीय वातावरणात चैतन्य निर्माण झाले असून, इच्छुक उमेदवारांच्या गाठीभेटींना वेग आला आहे.