श्रीवर्धन प्रांत कार्यालयात ACB चा महाधमका! सातबारा दुरुस्तीसाठी ६० हजारांची लाच मागून पहिला हप्ता स्वीकारताना अव्वल कारकून आणि शिपाई रंगेहात जेरबंद!

​पाबरे येथील शेतकऱ्याची दोन महिन्यांपासून सुरू होती अडवणूक!

​डीवायएसपी सरिता भोसले यांच्या मार्गदर्शनाखाली अलिबाग ‘एसीबी’ची धडाकेबाज कारवाई.

​३० हजारांची रोकड स्वीकारताना महसूलचे दोन बडे मासे जाळ्यात; जिल्ह्यात प्रचंड खळबळ.

​श्रीवर्धन (संदेश घोलप)

सरकारी कार्यालयांमध्ये सामान्य शेतकऱ्यांची कशी पिळवणूक केली जाते, याचे एक संतापजनक आणि तितकेच खळबळजनक प्रकरण श्रीवर्धनमध्ये समोर आले आहे. श्रीवर्धन उपविभागीय कार्यालयातील (प्रांत कार्यालय) भ्रष्टाचाराचा बुरखा टराटरा फाडत लाचलुचपत प्रतिबंधक विभागाने (ACB) बुधवारी एक मोठी आणि धडक कारवाई केली. सातबारा उताऱ्यावरील दुरुस्ती करून देण्यासाठी चक्क ६० हजार रुपयांची लाच मागून, त्यातील पहिला हप्ता म्हणून ३० हजार रुपयांची रोकड स्वीकारताना अव्वल कारकून आणि शिपायाला ‘एसीबी’च्या पथकाने रंगेहात दबोचले. या कारवाईमुळे रायगड जिल्ह्यातील महसूल विभागात प्रचंड कंप सुटला आहे.

​नितीन पवार आणि सचिन पाटील एसीबीच्या जाळ्यात!

नितीन पवार (अव्वल कारकून) आणि सचिन पाटील (शिपाई, दोघेही कार्यरत – उपविभागीय कार्यालय, श्रीवर्धन) अशी लाच स्वीकारताना रंगेहात पकडण्यात आलेल्या शासकीय कर्मचाऱ्यांची नावे आहेत. सामान्यांना वेठीस धरून शासकीय खुर्चीचा गैरवापर करणाऱ्या या दोघांनाही ‘एसीबी’ने ताब्यात घेतले असून त्यांच्यावर गुन्हा दाखल करण्याची प्रक्रिया रात्री उशिरापर्यंत सुरू होती.

​२ महिन्यांपासून शेतकऱ्याची अडवणूक; मागितली ६० हजारांची लाच!

​मिळालेल्या सविस्तर माहितीनुसार, श्रीवर्धन तालुक्यातील पाबरे येथील एका शेतकऱ्याच्या सातबारा उताऱ्यामध्ये दुरुस्ती करण्याचे काम प्रलंबित होते. या हक्काच्या कामासाठी हा शेतकरी गेल्या दोन महिन्यांपासून श्रीवर्धन प्रांत कार्यालयात आणि संबंधितांच्या उंबरठ्यावर वारंवार फेऱ्या मारत होता. मात्र, नियमानुसार काम करून देण्याऐवजी, संबंधित कर्मचाऱ्यांनी या शेतकऱ्याकडे तब्बल ६० हजार रुपयांच्या भरमसाठ लाचेची मागणी केली. दोन महिने मानसिक त्रास सहन केल्यानंतर आणि हक्काच्या कामासाठी लाच देण्याची मुळीच इच्छा नसल्याने, शेतकऱ्याने अत्यंत धाडसाने लाचलुचपत प्रतिबंधक विभागाकडे (ACB) या प्रकरणी रीतसर तक्रार नोंदवली.

​डीवायएसपी सरिता भोसले यांचा अचूक ‘गेम प्लॅन’ आणि नाट्यमय कारवाई!

​तक्रारदाराच्या अर्जाची अत्यंत गोपनीयतेने शहानिशा केल्यानंतर, लाचलुचपत प्रतिबंधक विभागाच्या उपअधीक्षक (DYSP) सरिता भोसले यांच्या मार्गदर्शनाखाली अलिबाग ‘एसीबी’च्या पथकाने बुधवारी (१७ जून) श्रीवर्धन प्रांत कार्यालय परिसरात चक्रव्यूह रचला.

​ठरल्याप्रमाणे, ६० हजारांच्या लाचेचा पहिला हप्ता म्हणून ३० हजार रुपयांची रोकड घेऊन तक्रारदार शेतकरी कार्यालयात पोहोचला. लाचखोर अव्वल कारकून नितीन पवार आणि शिपाई सचिन पाटील यांनी ती ३० हजारांची रक्कम हातात घेताच, दबा धरून बसलेल्या ‘एसीबी’च्या पथकाने झडप घातली आणि दोघांनाही रंगेहात जेरबंद केले. अचानक झालेल्या या धाडीमुळे प्रांत कार्यालयातील इतर अधिकारी आणि कर्मचाऱ्यांची एकच पळापळ झाली.

​भ्रष्टाचाराच्या वाळवीने पोखरलेला महसूल विभाग पुन्हा चर्चेत!

​शेतकऱ्यांच्या सातबारा आणि जमिनीच्या हक्काच्या नोंदींसाठी शासकीय कार्यालयांमध्ये कशा प्रकारे अडवणूक करून खिसे गरम केले जातात, हे या कारवाईने पुन्हा एकदा सिद्ध केले आहे. या धडक कामगिरीबद्दल पाबरे पंचक्रोशीतील नागरिकांसह संपूर्ण श्रीवर्धन तालुक्यातून डीवायएसपी सरिता भोसले आणि त्यांच्या पथकाचे कौतुक होत आहे.

​या दोन्ही लाचखोर कर्मचाऱ्यांविरुद्ध भ्रष्टाचार प्रतिबंधक कायद्यान्वये गुन्हा दाखल करण्याचे काम सुरू असून, त्यांच्या संपूर्ण कार्यकाळातील इतर प्रकरणांची आणि मालमत्तेची देखील चौकशी होण्याची दाट शक्यता वर्तवली जात आहे.