अतिवृष्टीमुळे खचलेल्या बंधाऱ्यांसाठी निधी द्या
जिल्हाध्यक्ष बळीराम गवते यांचे जिल्हाधिकाऱ्यांना निवेदन
बीड: मागील वर्षी झालेल्या अतिवृष्टीमुळे पारगाव (शिरस) येथील डोंबरी नदीवरील दोन महत्त्वाचे बंधारे फुटून मोठ्या प्रमाणावर नुकसान झाले आहे. पावसाळा तोंडावर आला असतानाही या बंधाऱ्यांची दुरुस्ती न झाल्याने आगामी काळात शेतकऱ्यांना मोठा फटका बसण्याची शक्यता आहे. त्यामुळे या दोन्ही बंधाऱ्यांच्या दुरुस्तीसाठी प्रशासनाने तातडीने निधी उपलब्ध करून द्यावा, अशी मागणी राष्ट्रवादी काँग्रेसचे युवक जिल्हाध्यक्ष बळीराम गवते यांनी जिल्हाधिकाऱ्यांकडे केली आहे.
या संदर्भात बळीराम गवते यांनी जिल्हाधिकारी विवेक जॉन्सन यांची भेट घेवून लेखी निवेदन दिले. निवेदनामध्ये म्हटले आहे, पारगाव पारगाव (शिरस) ता.जि.बीड अंतर्गत येणाऱ्या डोंबरी नदीवर के.टी.वेअर बंधारा क्र.२ आणि ३ बांधण्यात आलेले आहेत. मात्र, मागील वर्षी या भागात झालेल्या मुसळधार अतिवृष्टीमुळे या दोन्ही बंधाऱ्यांचे प्रचंड नुकसान झाले आहे. अतिवृष्टीच्या पाण्याच्या प्रवाहामुळे:
दोन्ही बंधाऱ्यांची मोठ्या प्रमाणावर पडझड झाली आहे. बंधाऱ्यांचे दरवाजे पाण्याच्या प्रवाहात वाहून गेले आहेत. बंधाऱ्यांची सुरक्षा भिंत (संरक्षण भिंत) पूर्णपणे तुटलेली आहे. आता अवघ्या काही दिवसांवर पावसाळा येऊन ठेपला आहे. पावसाळ्यापूर्वी जर या दोन्ही बंधाऱ्यांची आणि त्यांच्या तुटलेल्या भिंतींची दुरुस्ती झाली नाही, तर आगामी पावसाळ्यात नदीला पूर आल्यास आजूबाजूच्या शेतीचे अपरिमित नुकसान होऊ शकते. पाणी थेट शेतात घुसून सुपीक जमिनी वाहून जाण्याचा आणि शेतकऱ्यांना मोठा त्रास सहन करावा लागण्याचा धोका निर्माण झाला आहे. दरम्यान, या मागणीचे निवेदन जिल्हाधिकारी कार्यालयात सादर करण्यात आले असून, प्रशासनाने यावर तत्परतेने सकारात्मक पाऊल उचलून निधी उपलब्ध करून द्यावा, अशी आग्रही मागणी परिसरातील शेतकऱ्यांकडूनही केली जात आहे.
००
जिल्हाधिकाऱ्यांची कर्तव्यकठोरता
युवक जिल्हाध्यक्ष बळीराम गवते यांनी बंधाऱ्याचे निवेदन दिल्यानंतर तातडीने संबंधित अधिकारी यांना बोलावून घेत सदरील काम पावसाळ्याआधी पूर्ण करून घेण्याच्या सूचना दिल्या. शिवाय तालुक्यातील इतर बंधाऱ्याच्या दुरुस्तीसाठी प्रयत्न करावेत असेही म्हटले.
००
पारगाव येथील शेतकऱ्यांचे नुकसान टाळण्यासाठी आणि त्यांच्या जमिनी सुरक्षित राहण्यासाठी या दोन्ही बंधाऱ्यांची पावसाळ्यापूर्वी दुरुस्ती होणे अत्यंत गरजेचे आहे. जिल्हा प्रशासनाने आपल्या स्तरावरून यासाठी तातडीने विशेष निधी मंजूर करावा.
—बळीराम गवते (युवक जिल्हाध्यक्ष, राष्ट्रवादी काँग्रेस पार्टी, बीड)
