बीड
संघर्षात सावली, लढ्यात ढाल — नाना काळकुटेंचा समाजसेवेचा सन्मान.
संघर्षात सावली, लढ्यात ढाल — नाना काळकुटेंचा समाजसेवेचा सन्मान.
मराठा समाजासाठी ढाल बनून उभे राहणाऱ्या नानांच्या कार्याला राष्ट्रीय पातळीवर दखल.
नेकनूर प्रतिनिधी (गणेश काळे):
मराठा समाजाच्या लढ्यात मनोज दादा जरांगे पाटील यांची सावली म्हणून कायम त्यांच्या पाठीशी खंबीरपणे उभे राहिलेले गंगाधर नाना काळकुटे हे नाव आज मराठा समाजात विश्वासाचे आणि निष्ठेचे प्रतीक बनले आहे. मराठा समाजासाठी तन-मन-धन अर्पण करून अखंड कार्य करणाऱ्या या समाजसेवकाचा नुकताच दिल्ली येथे प्रतिष्ठित पुरस्कार देऊन सन्मान करण्यात आला.
मनोज दादा जरांगे पाटील यांच्या नेतृत्वाखाली सुरू असलेल्या मराठा आरक्षण चळवळीत गंगाधर नाना काळकुटे यांनी सुरुवातीपासून महत्त्वाची भूमिका बजावली आहे. आंदोलन असो, समाजातील अन्यायाविरोधातील आवाज असो किंवा कार्यकर्त्यांचे मनोबल उंचावण्याचे काम असो—प्रत्येक ठिकाणी नाना काळकुटे हे दादांच्या पाठीशी ढाल बनून उभे राहिलेले दिसतात. “नाना आणि दादा” हे समीकरण आज मराठा समाजात घट्ट नात्याचे प्रतीक मानले जाते.
दैनिक सूर्योदय व डिजिटल माध्यमांच्या माध्यमातून समाजातील प्रश्न, आरक्षणाचा लढा आणि मराठा समाजाच्या भावना जनतेपर्यंत पोहोचवण्याचे काम नानांनी सातत्याने केले. संघर्षाच्या काळात अनेक अडचणी, दबाव आणि टीका सहन करूनही ते डगमगले नाहीत. समाजासाठी निष्ठेने उभे राहणे, हेच त्यांच्या कार्याचे वैशिष्ट्य राहिले आहे.
दिल्ली येथे झालेल्या या सन्मानामुळे नाना काळकुटे यांच्या कार्याची राष्ट्रीय पातळीवर दखल घेतली गेली असून, मराठा समाजात समाधान आणि अभिमानाची भावना व्यक्त होत आहे. “हा पुरस्कार वैयक्तिक नसून संपूर्ण मराठा समाजाच्या संघर्षाचा सन्मान आहे,” अशी प्रतिक्रिया यावेळी अनेक कार्यकर्त्यांनी दिली.
मनोज दादा जरांगे पाटील आणि गंगाधर नाना काळकुटे यांचे हे घट्ट नाते, संघर्ष आणि निष्ठेची सांगड घालणारे ठरत असून, आगामी काळातही मराठा समाजाच्या हक्कांसाठी हे दोघे खांद्याला खांदा लावून लढत राहतील, असा विश्वास समाजातून व्यक्त होत आहे.
